Mic 4 | NdeIBE | STEP | Ngezinsuku zokucina intaba yethempeli likaJehova izamiswa njengenhloko phakathi kwezintaba; izaphakanyiselwa phezu kwezintaba njalo izizwe zizathululeka kuyo.

Micah 4

INtaba KaJehova

1 Ngezinsuku zokucina intaba yethempeli likaJehova izamiswa njengenhloko phakathi kwezintaba; izaphakanyiselwa phezu kwezintaba njalo izizwe zizathululeka kuyo.

2 Izizwe ezinengi zizafika zithi, “Wozani sikhwele entabeni kaJehova, siye endlini kaNkulunkulu kaJakhobe. Uzasifundisa izindlela zakhe, ukuze sihambe emikhondweni yakhe.” Umthetho uzavela eZiyoni, ilizwi likaJehova livele eJerusalema.

3 Uzakwahlulela phakathi kwezizwe ezinengi alamule lezingxabano zezizwe ezilamandla ezindaweni ezikhatshana. Bazakhanda izinkemba zabo zibe yimilomo yamakhuba, lemikhonto yabo ibe zingqamu zokuthena izihlahla. Isizwe kasiyikuhlomela esinye isizwe ngenkemba, loba zifundele ukulwa impi futhi.

4 Umuntu wonke uzahlala ngaphansi kwesihlahla sakhe sevini langaphansi kwesihlahla sakhe somkhiwa, njalo kakho ozabenza besabe, ngoba uJehova uSomandla usekhulumile.

5 Zonke izizwe zingahamba ebizweni labonkulunkulu bazo; thina sizahamba ebizweni likaJehova uNkulunkulu wethu kuze kube laphakade.

Icebo LikaJehova

6 “Ngalolosuku,” kutsho uJehova, “ngizabutha abaqhulayo; ngizaqoqa abathunjwayo lalabo engabehlisela usizi.

7 Ngizakwenza abaqhulayo babe yinsalela, abaxotshwayo babe yisizwe esilamandla. UJehova uzababusa eNtabeni iZiyoni, kusukela ngalolosuku kuze kube nininini.

8 Wena nqaba yokulinda yomhlambi, wena nqaba yeNdodakazi yeZiyoni, umbuso wakuqala uzabuyiselwa kuwe; ubukhosi buzakuza eNdodakazini yaseJerusalema.”

9 Kungani khathesi usukhala kakhulu – kawulankosi na? Umeluleki wakho usebhubhile na, ukuba uphathwe yibuhlungu obunjengowesifazana ohelelwayo?

10 Janqula ngobuhlungu, wena Ndodakazi yeZiyoni, njengowesifazana ohelelwayo, ngoba khathesi sekumele usuke kulelidolobho uyehlala egangeni. Uzakuya eBhabhiloni; lapho ozahlengwa khona. Khonale uJehova uzakukhulula ezandleni zezitha zakho.

11 Kodwa khathesi izizwe ezinengi zikujamele. Zithi, “Kangcoliswe, lamehlo ethu kawahawukele iZiyoni!”

12 Kodwa kabayazi imicabango kaJehova; kabaliqedisisi icebo lakhe, yena obabutha njengezixha zamabele esizeni.

13 “Sukuma ubhule, wena Ndodakazi yeZiyoni, ngoba ngizakupha izimpondo zensimbi; ngizakunika amasondo ethusi, njalo uzachoboza izizwe ezinengi.” Uzanikela kuJehova inzuzo yabo eyatholwa ngobuqili inotho yabo kuJehova womhlaba wonke.